Azərbaycanda ilk dəfə olaraq ödənişli atalıq məzuniyyətini nəzərdə tutan qanun layihəsi hazırlanır. Bu barədə Ailə, Qadın və Uşaq Problemləri üzrə Dövlət Komitəsinin sədri Bahar Muradova BMT-nin Nyu-York şəhərində keçirilən Qadınlara dair Dördüncü Dünya Konfransının 30 illiyinə həsr olunmuş Yüksək Səviyyəli İclasda çıxışı zamanı məlumat verib.
Bahar Muradova bildirib ki, ölkədə qadın əməyinin qadağan olunduğu sahələrin sayı minimuma endirilib, məişət zorakılığı, uşaq evlilikləri və qohum nikahları ilə bağlı qanunvericilik bazası təkmilləşdirilib, nikah yaşına dair istisnalar isə ləğv edilib.
Mövzu ilə bağlı Azərbaycan Respublikası Vəkillər Kollegiyasının üzvü, vəkil Aynurəxanım Ağalarova Respublikainfo.com-a açıqlamasında bildirib ki, hazırlanan layihəyə əsasən, uşağın doğulması ilə bağlı atalara da ödənişli məzuniyyət hüququ veriləcək. Layihə hələlik razılaşdırma mərhələsindədir və Milli Məclisdə müzakirəyə çıxarıldıqdan sonra təsdiqlənəcəyi gözlənilir. Qeyd edek ki, bundan əvvəldə əmək məcəlləsində ödənişsiz atalıq məzuniyyəti nəzərdə tutulmuşdur.
Aynurxanım Ağalarova hesab edir ki, bu addım ailə institutunun möhkəmlənməsinə, valideyn məsuliyyətinin bölüşdürülməsinə və cəmiyyətdə gender bərabərliyinin gücləndirilməsinə mühüm töhfə verəcək.
