Ermənistan baş naziri Nikol Paşinyan ŞƏT sammitindən çıxışı zamanı bildirib ki, Naxçıvana gediş-gəliş üçün maneəsiz əlaqə yaradılacaq. Həmçinin Paşinyan deyib ki, Avqustun 8-də Vaşinqtonda Ermənistanla Azərbaycan arasında sülhün və dövlətlərarası münasibətlərin yaradılması haqqında Sazişi paraflanmasından sonra iki ölkə arasında sülh yaranıb. Paşinyan eyni zamanda onu da bildirib ki, bu, daha geniş regional əhəmiyyətə malik olacaq tarixi dönüş nöqtəsidir. Dünən sammitdə iştirak edən liderlər bizi və Azərbaycanı sülhün bərqərar olması münasibətilə təbrik etdilər.
Beləliklə Paşinyanın bu dediklərinin fonunda Azərbaycanla Ermənistan arasında yaxın gələcəkdə daha hansı müsbət addımlar gözlənilirmi?
Mövzu ilə bağlı BMDAM-nın sədri, politoloq Samir Hümbətov Referans-a açıqlamasında bildirib ki, münaqişənin həlli ilə bağlı marağı olan Rusiya, Çin və digər ölkələr var. Bu kimi ölkələrin fonunda o cür böyük bir sammitdə belə bir fikrin səsləndirilməsi, Paşinyan əslində mesaj verir ki, “baxın regiona sülh gəlib. İmkan verin, şərait yaradın biz öz başımızın çarəsinə baxaq. Bu problemi aradan qaldıraq və region rahat nəfəs ala bilsin.” Paşinyan açıq şəkildə Rusiya və İrana mesaj ötürmüş oldu. Ki, bu 8 avqust anlaşması bizim üçün müsbət mənada tarixi bir şansdır və biz bundan faydalanmaq istəyirik. Əslində Paşinyanın fikirləri buna hesablanmışdır.
Samir Hümbətovun fikrincə məsələ burasındadır ki, bu əldə olunan razılaşmalar həm Azərbaycan tərəfindən, həm də Ermənistan tərəfindən yerinə yetirilməkdə maraqlı olduğu görünülür. Yəni burda Azərbaycanın üzərinə düşən öhdəlik çox azdır, lakin Ermənistanda bu öhdəliklər çoxdur. Məsələn konstitusiyanın dəyişdirilməsi və s. Bunu Paşinyanda başa düşür. Azərbaycanda əslində Ermənistanla münasibətləri normal istiqamətə yönəldib. Problem ondadır ki, kənar güclər Ermənistana etdiyi müdaxilənin nəticəsi olaraq gərginliklər artır.
“Belə bir durumda Nikol Paşinyanın bu cür açıqlama verməsi təbiidir. Bəs nə kimi addımlar atıla bilər? Sülh müqaviləsinin imzalanması üçün lazım olacaq bəndlər icra oluna bilər. Təbii ki, sülh müqaviləsi qısa müddətə həll olunarsa daha sonrakı mərhələdə diplomatik və siyasi əlaqələrdə qurula bilər. Yavaş-yavaş münasibətlərdə dəyişim prosesi gedə bilər. Amma bunlar üçün təbii ki, zaman lazımdır. Bunu birdən-birə etmək olmaz. Bu zamanı da tərəflər özləri müəyyənləşdirəcək. Təbii ki, kənar güclər müdaxilə etməsə”, – deyə Samir Hümbətov qeyd edib.
Məmmədov Hüseyn
