Bu gün dünyanın Şərqi və Qərbində səpələnmiş, böyük tarixin varisi, zəngin mədəniyyətin sahibi, milli kimliyimizin üzü Türklərin və Türklüyün günüdür.
3 May – Türkçülük Günü münasibətilə sadəcə irqi deyil, sosial varlıq olaraq da özünü Türk sayan hər bir Türkçünün mübarizəsinə “Qutlu olsun!”, hər bir Türk dostuna “Var olun!” deyir, Türk millətinin azadlığı və istiqlalı üçün canından keçən şəhidlərimizin ruhu qarşısında baş əyir, Türkçülük bayrağını bizə əmanət edən Türkçü atalarımızın əziz xatirələrini ehtiramla yad edirəm!
Yaşasın Türk Birliyi!
Sevgili Azərbaycan Gəncliyi!
Bəzən sizlərin sualları yaranır ki, demokratik ideyaların cazibəsindən daha çox danışmaq və yazmaq yerinə Türkçü düşüncədən yazır və danışırıq. Cavabımız çox sadədir: demokratiya bir millətin azad yaşaması üçün zəruri şərtdir, lakin onun üzərində yüksələn təməl milli kimlik, milli dəyərlərdir. Demokratiya yalnız millətin özünü ifadə edə biləcəyi bir mühit təmin edər, amma bu mühitdə məzmunu yaradan və ruhu formalaşdıran bir siyasi prinsiplər dəyəri, milli ideologiya olmalıdır.
Milli ideologiyasız isə demokratiya savaşı aparmaq mümkün deyil, olsa belə qalıcı deyil.
Milli ideologiyamız Türkçülükdür!
Millətimizin özünü idarə etməsinin ən doğru yolu isə DEMOKRATİYADIR!
Milli şüur olmadan demokratik hərəkat məğlubiyyətə məhkumdur!
Prinsip olmadan heç bir şeyin məntiqi olmur; demokratiya mücadiləsi də bir prinsipin əsasında qurulmalıdır. Buna görə də demokratiya və Türkçü düşüncə bir-birindən ayrı deyil, əksinə bir-birini tamamlayan anlayışlardır. Məhz buna görə biz, haqlı davamızda hər ikisini də mübarizəmizin əsas sütunları olaraq qəbul edirik.
ANAR ƏSƏDLİ
