Respublikainfo.com xəbər verir ki, bəstəkar-müğənni SİVVA və bəstəkar-aranjemançı Camal Qurbanov hər kəsin tanıdığı ” Dağlar qızı Reyhan” mahnısını öz dinləyicilərinə fərqli improvizasiyada təqdim ediblər.
Görkəmli bəstəkarın məşhur mahnısı yeni tərzdə…
Sivva mahnıda muğam oxumağı ilə diqqət çəkib: Atam Məmməd Ağasıyev tarzən idi. Evdə həmişə muğamları dinləmişəm.
Oxu tərzimdə şaman-mantra boğazları da var və düşünürəm maraqlı alınıb. Aranjemanda isə afro-etno elementləri əziz və istedadlı dostum Camal Qurbanov etdi. Ona təşəkkür edirəm.
Yeri gəlmişkən layihənin musiqi prodüseri Camal Qurbanov mahnıya yeni nəfəs verdiklərini düşünür: “Dağlar qızı Reyhan” mahnısını ilk dəfə dahi Rəşid Behbudov oxuyub. Sonradan Zeynəb Xanlarovanın ifasında məşhurlaşıb. Müasir ifaçılardan da çoxları mahnını ifa edib. Xalq arasında çox sevilir. Ona görə də düşündük ki, mahnıya fərqli münasibət göstərək və dinləyicilərə özümüzə məxsus dəstixətlə çatdıraq. Ona xələl gətirməmişik.
Ümumiyyətlə missiyamız dinləyicilərə xalq və bəstəkar mahnılarını müasir, həm də yeni formada çatdırmaqdır. Bu üslubda mahnıların davamı olacaq və albom şəklində təqdim ediləcək. Həmçinin konsert proqramı nəzərdə tutulub. Camal Qurbanov Sivva ilə iş birliyinin maraqlı olduğunu bildirib: Sivva etnik, klassik və modern ifaları ilə seçilən sənətçilərdəndir. Bu, mənə bizim ortaq layihələrimizin yaranmasına stimul verir.
Onu da qeyd edək ki, “Dağlar qızı Reyhan” mahnısına klip də çəkilib. Kənd həyatının əks olunduğu ekran işində öz geyim tərzi ilə Sivva əsl dağlar qızı obrazını yaratmağa nail olub.
Baş redaktor: Bünyamin Çingizoğlu
Respublikainfo.com
