Xüsusilə son illər ölkəmizin Mərkəzi Asiya ölkələri, o cümlədən türk dövlətləri ilə münasibətlərində böyük canlanma müşahidə olunur. Ölkələrin xarici siyasətlərində labüd olan hallardan biri də qarşılıqlı münasibətləri inkişaf etdirmək, baş verən qlobal təsirlərə qarşı birlikdə mübarizə aparmaqdır. Bu mənada son illər dünyada baş verən proseslər ölkələrdən birgə əməkdaşlıq, birlikdə hərəkət etməyi və ümumi səylər göstərməyi tələb edir.
Möhtərəm Prezident cənab İlham Əliyevin son bir neçə il ərzində Mərkəzi Asiya, o cümlədən regionun türkdilli ölkələrinə ardıcıl səfərləri və həmin dövlətlərin başçılarının Azərbaycana səfərləri Türk dünyası üzvləri ilə əlaqələrimizin genişlənməsini, dərinləşməsini və strateji xarakter almasını şərtləndirir. Tarixi Zəfər əldə etdiyimiz Vətən müharibəsindən sonra Azərbaycanın nəqliyyat-logistika imkanlarının genişlənməsi ölkəmizi Şərqlə Qərb arasında mühüm nəqliyyat qovşağına çevirib. Təsadüfi deyil ki, bu gün Mərkəzi Asiya ölkələrindən Avropaya gedən ən qısa və təhlükəsiz tranzit daşımalar məhz ölkəmizin ərazisindən həyata keçirilir. Orta Dəhlizin artan əhəmiyyəti günümüz reallığında dövlətimiz üçün geniş imkanlar vəd edir. Son illər ərzində cənab İlham Əliyevin uzaqgörən, düşünülmüş siyasətinin nəticəsi olaraq Azərbaycanda müasir nəqliyyat-logistika infrastrukturunun yaradılması ölkəmiz üçün bu gün geniş imkanlar açıb. Ölkə başçımızın avqustun 22-23-ü tarixlərində dost Özbəkistana növbəti dövlət səfəri bu baxımdan daha böyük əhəmiyyətə malikdir. Səfər zamanı səsləndirilən bəyanatlar, qəbul edilən qərarlar, ən əsası strateji tərəfdaşlıq haqqında imzalanmış müqavilə ikitərəfli münasibətlərimizi keyfiyyətcə yeni mərhələyə qaldırmaqla, yaxın gələcəkdə regionun geosiyasi mənzərəsinin irəliyə doğru dəyişiləcəyinə əminlik yaratdı.
Cənab Prezidentin tarixi Özbəkistan səfəri çərçivəsində keçirilən Daşkənd görüşləri çoxtərəfli münasibətlərimizin bütün spektrinin ətraflı müzakirəsi, əsas istiqamətlər üzrə məruzələrin dinlənilməsi, böyük iqtisadi perspektivlər vəd edən sənədlərin imzalanması ilə yadda qaldı. Bu səfər, hər şeydən əvvəl, böyük imkanlarımızın olduğu ticarət, sənaye kooperasiyası, energetika, nəqliyyat, kənd təsərrüfatı, təhlükəsizlik, mədəniyyət və digər sahələrdə əməkdaşlıqlarımıza daha geniş qapılar açdı. Özbəkistan Respublikasının Prezidenti Şavkat Mirziyoyev də bu mütərəqqi addımın atılmasında başlıca amil kimi, ölkələri, xalqları bir araya gətirmək üçün siyasi iradənin mövcudluğunu diqqətə çəkdi. Azərbaycan lideri isə müttəfiqlik münasibətləri haqqında müqavilənin iki ölkənin imzalaya biləcəyi ən yüksək beynəlxalq sənəd olduğunu vurğuladı. Bu gün görünən odur ki, bir sıra dövlətlərin on illər ərzində əldə etdiyi nailiyyətə Azərbaycan və Özbəkistan dost, qardaş ölkələr olaraq ən qısa müddətdə nail olmaqla, əsl nümunə, etalon nümayiş etdirməkdədirlər.
Aynur Cəfərova;
Neftçala rayonu, həkim
