Azərbaycan Respublikasının Prezidenti İlham Əliyevin müəyyən etdiyi nəqliyyat strategiyası çərçivəsində Azərbaycan tranzit ölkə statusunu möhkəmləndirir, dəmir yolunun ölkənin iqtisadi və geosiyasi xəritəsində rolu daha da artır. “AZCON Holding” şirkətlərindən olan “Azərbaycan Dəmir Yolları” QSC (ADY) ölkənin nəqliyyat və logistika sahəsində strateji dönüş yaradan daha bir layihəni uğurla başa çatdırıb. Bakı–Böyük Kəsik dəmir yolu xəttində enerji sisteminin layihələndirilməsi, təchizatı və quraşdırılması çərçivəsində Ucar–Hacıqabul sahəsində (122 km) dəyişən cərəyan (AC) sisteminin tətbiqi üzrə işlər başa çatdırılıb, bu xətdə yük və sərnişin qatarlarının test yürüşləri uğurla həyata keçirilib. Ümumiyyətlə “Azərbaycan Dəmir Yolları” QSC (ADY) bu ilin sonunadək daha hansı yeniliklərin icrasını planlaşdırır? Bu istiqamətdə hansı dəyişikliklər gözlənilir?
Sözügedən mövzu ilə bağlı “Azərbaycan Dəmir Yolları” Qapalı Səhmdar Cəmiyyətinin (QSC) İctimaiyyətlə əlaqələr şöbəsinin müdiri Bəxtiyar Hacıyev Referans-ın sorğusuna cavab olaraq bildirilib ki, hazırda Azərbaycan dəmir yollarında bir sıra infrastruktur layihələri həyata keçirilir. Bu layihələr arasında Qarabağ və Şərqi Zəngəzurda dəmiryol infrastrukturunun yenidən qurulması və bərpası da xüsusi yer tutur.
Bəxtiyar Hacıyev onu da diqqətə çatdırıb ki, Horadiz-Ağbənd dəmir yolu xəttinin layihələndirilməsi işlərinin 84, tikinti-quraşdırma işlərinin 67 faizi başa çatdırılıb. Bərdə-Ağdam dəmir yolu xətti layihəsi üzrə işlər, demək olar, yekunlaşıb. Avqustun 30-dan Bakı-Ağdam-Bakı marşrutu üzrə sərnişin daşımalarına başlanılıb. Bu xəttin davamı olaraq Ağdam-Xankəndi dəmir yolu xəttinin layihələndirilməsi işləri davam etdirilir. Şimal-Cənub dəhlizi üzrə əsas xətlərdən olan Sumqayıt-Yalama dəmir yolunun yenidən qurulması işlərinin 90 faizdən çoxu yekunlaşıb. Həmçinin bu ilin iyulunda Dərnəgül stansiyasının tikinti işlərinə başlanılıb.
“Bu qeyd olunan məsələlər hər biri ilin sonuna qədər davam edəcək. Yalnız Dərnəgül stansiyasının il sonuna qədər tikinti işlərinin yekunlaşdırılması planlaşdırılır”,-deyə Bəxtiyar Hacıyev əlavə edib.
