Qarabağ Universitetinin yaradılması, Azərbaycanın tarixi torpaqlarına qayıdış prosesinin rəmzi olaraq, həm strateji, həm də simvolik bir hadisədir. Bu təhsil ocağının təsis edilməsi təkcə ali təhsil qurumunun yaradılması demək deyil, eyni zamanda xalqımızın öz əzəli torpaqlarına və milli kimliyinə olan bağlılığının göstəricisidir.
Qarabağ, əsrlər boyu Azərbaycanın mədəni, tarixi və iqtisadi mərkəzlərindən biri olmuşdur. 30 ilə yaxın müddət ərzində Ermənistanın işğalı altında qalan tarixi ərazimiz, hər zaman xalqımızın yaddaşında xüsusi yer tuturdu. Qarabağ Universitetinin yaradılması, həm də burada elm və təhsilə yeni həyat verilməsi demək idi. Bu universitet, təkcə təhsil ocağı kimi deyil, həm də Azərbaycanın Qarabağda bərpa olunan mədəniyyətinin və milli varlığının təcəssümüdür. Universitet, təkcə elmi biliklərin ötürüldüyü məkan kimi deyil, həm də milli-mənəvi irsin və dəyərlərin yaşadıldığı, nəsildən-nəslə ötürüldüyü bir ocaq olacaq.
Qarabağ Universiteti gənc nəsillərə yalnız təhsil verməklə kifayətlənməyəcək, eyni zamanda Qarabağ bölgəsinin zəngin tarixi, mədəni irsi və milli dəyərlərini öyrədəcək. Qarabağ Universiteti, Azərbaycanın təhsil sahəsindəki strateji inkişafının bir hissəsi kimi nəzərdə tutulub. Burada yaradılacaq elmi mərkəzlər, texnoparklar və araşdırma institutları regionun təhsil və elmi potensialını artıraraq, ölkə təhsilinin inkişafına töhfələr verəcəkdir. Şübhə yoxdur ki, bu Universitet ən qısa zamanda beynəlxalq səviyyədə də tanınmış bir elm mərkəzinə çevriləcəkdir. Qarabağ Universitetinin yaradılması Azərbaycanın bu regiondakı suveren hüquqlarını və əzəli torpaqlarına olan sahibliyini möhkəmləndirir.
Bu addım, Azərbaycan dövlətinin Qarabağı yenidən inkişaf etdirmək və orada həyatın bütün sahələrini bərpa etmək istiqamətində olan iradəsinin təzahürüdür. Universitet, ölkənin Qarabağda bərpa etdiyi normal həyatın simvolu kimi də çıxış edir. Bu, həm də dünya ictimaiyyətinə Azərbaycanın bu ərazilərdə sülh və rifahı təmin etmək niyyətində olduğunun bir sübutudur.
Nazim Dadaşov;
Neftçala rayonu
