Rus dili söhbətləri ilə Putin hələ də Sovet İttifaqının ruhunu diriltmək istəyir. O, tanklardan çox dili silah kimi görür. Çünki düşünür ki, rus dili nə qədər çox yayılarsa, keçmiş imperiyanın sərhədlərini o qədər asan bərpa etmək mümkün olacaq. Kreml üçün rus dilinin beynəlxalq arenada güclənməsi, sadəcə mədəni məsələ deyil — bu, siyasi təsir alətidir.
Amma gerçəklik bundan çox uzaqdır. Sovet İttifaqı artıq yalnız tarix kitablarında qalıb.
Müasir dövrdə müstəqillik qazanan dövlətlərin heç biri — istər Baltik ölkələri, istər Qafqaz respublikaları, istərsə də Mərkəzi Asiya dövlətləri — bir daha Moskvanın himayəsinə qayıtmaq istəmir. Hansı dildə danışmalarından asılı olmayaraq, bu xalqlar azadlığın dadını görüblər və onu itirmək istəmirlər.
Çünki müasir dünya təkcə gücə yox, həm də azadlığa, milli kimliyə və iqtisadi əməkdaşlığa əsaslanır.
Sovet İttifaqının dirçəlməsi artıq nə coğrafi, nə iqtisadi, nə də mənəvi baxımdan mümkün deyil. Tarix irəli gedir — geriyə yox. Və bu gün postsovet məkanında xalqlar rus dilində yox, öz dillərində danışaraq, öz yollarını tapırlar.
Digər əsas məsələ isə budur ki, rus dilinin ana vətəni olan Rusiya və rus xalqı illərdir hakimiyyətə demokrat gətirə bilmir, şiddətə, qana, terrora, və qanun pozuntularına yol verir. Halbuki rus dilini bilməyən ölkələrdə insan haqları və demokratiya işi uğurla həyata keçir. Nümunə üçün, rus dilini çoxdan istifadədən çıxarmış Baltikyanı ölkələri, Finlandiyanı və.s ölkələri göstərə bilərik.
Qısacası Putin üçün rus dili “birlik” xəyalının son qalasıdır. Dilin yayılması ideoloji təzyiq vasitəsi ola bilər, imperiyanın bərpası üçün isə heç bir işə yaramaz. Ümumiyyətlə isə artıq Rusiya özü heç bir işə yaramır nəinki dili…
ANAR ƏSƏDLİ
