Ordubad Rayon İcra Hakimiyyətinin başçısı Vənənd kənd sakinlərinin müraciətlərini dinləyib
Ordubad Rayon İcra Hakimiyyətinin başçısı Rəcəb Rəhimli Vənənd kənd sakinləri ilə görüş keçirib və onların müraciətlərini dinləyib. Vətəndaş müraciətlərinin yerində araşdırılması və mövcud problemlərin operativ həlli məqsədilə təşkil olunan görüşdə İcra Hakimiyyətinin məsul əməkdaşları, aidiyyəti xidmət təşkilatlarının rəhbərləri, kənd icra nümayəndəsi və bələdiyyə sədri iştirak ediblər.
İcra başçısı çıxışında ölkəmizin müasir inkişafı, beynəlxalq arenada artan nüfuzu və bölgədə həyata keçirilən genişmiqyaslı layihələr barədə ətraflı məlumat verib. O, 44 günlük Vətən müharibəsində qazanılan tarixi qələbənin Azərbaycanın beynəlxalq mövqeyini daha da gücləndirdiyini, uğurlu diplomatiya nəticəsində ölkəmizin təkcə regionda deyil, qlobal səviyyədə nüfuzlu dövlətə çevrildiyini vurğulayıb. Görüşdə həmçinin Prezident İlham Əliyevin işğaldan azad edilmiş ərazilərə mütəmadi səfərləri və həmin bölgələrdə aparılan genişmiqyaslı yenidənqurma işlərinin Azərbaycanın inkişaf prioritetlərinin bariz nümunəsi olduğu qeyd edilib.
Çıxış zamanı yaxın gələcəkdə reallaşması gözlənilən Zəngəzur dəhlizinin əhəmiyyətindən də bəhs edilib. Qeyd olunub ki, bu dəhliz Azərbaycanın regional və beynəlxalq ticarət əlaqələrini daha da gücləndirəcək və ölkəmizin nəqliyyat-logistika mərkəzinə çevrilməsinə şərait yaradacaq. Xüsusilə, dəhlizin giriş qapısı olan Ordubad rayonunun bu prosesdən böyük fayda görəcəyi bildirilib. Həmçinin rayonun strateji mövqeyi nəzərə alınaraq burada yeni infrastruktur layihələrinin həyata keçirilməsi istiqamətində işlərin planlaşdırıldığı diqqətə çatdırılıb.
İcra başçısı “2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” çərçivəsində rayonda həyata keçiriləcək layihələr barədə də məlumat verib. Xüsusilə yol infrastrukturunun yenilənməsi, turizm potensialının artırılması və məşğulluq imkanlarının genişləndirilməsi istiqamətində görüləcək işlər haqqında danışıb. Bildirib ki, Dövlət Proqramının icrası bölgənin sosial-iqtisadi inkişafına təkan verəcək və müvafiq sahələrin dinamik inkişafını təmin edəcək. Bundan başqa, rayon ərazisində mədən sənayesinin yenidən dirçəldilməsi, keçmişdə fəaliyyət göstərən ipəkçilik və konserv istehsalı müəssisələrinin yenidən fəaliyyətə başlaması istiqamətində görüləcək tədbirlər barədə də məlumat verilib. Ordubadın qədim sənətkarlıq ənənələrinin yaşadılması və tarixi simasının qorunması məqsədilə “Sərşəhər” məscidinin, “Mədrəsə” binasının və “Ərbabın evi” adlanan tikililərin bərpa olunacağı, bu işlərin şəhərin yeni hazırlanan baş planına uyğun şəkildə həyata keçiriləcəyi vurğulanıb.
Daha sonra sakinlərin kəndin ümumi problemləri ilə bağlı müraciətləri dinlənilib. Onların məşğulluq məsələləri, körpü tikintisi, məhəllədaxili yolun asfaltlanması, özünüməşğulluq proqramlarına cəlb olunma və digər məsələlərlə bağlı səsləndirdikləri təkliflər məsul şəxslərin iştirakı ilə yerindəcə araşdırılıb və həlli üçün müvafiq tədbirlər müəyyənləşdirilib. Həlli vaxt tələb edən məsələlər isə nəzarətə götürülərək aidiyyəti qurumlara müvafiq tapşırıqlar verilib. Sakinlər rayon ərazisində vətəndaşların qəbulu və müraciətlərinə baxılması üçün yaradılan əlverişli şəraitdən məmnun olduqlarını bildirərək, göstərilən diqqət və qayğıya görə ölkə rəhbərliyinə minnətdarlıqlarını ifadə ediblər.
