Respublikainfo.com Media Qrupu ANAR ƏSƏDLİNİN növbəti yazısını təqdim edir:
Millətlərin taleyində elə şəxsiyyətlər var ki, onlar sadəcə fikir deyil, həm də əməl böyükləridir. Onların fəaliyyəti daim öz millətlərinin taleyində canlılıq yaradıb.
Bizim millətimiz fikir və əməli bütöv şəxsiyyətlərimizlə çox zəngindir.
Onları tanımadan, oxumadan, sevmədən aparılan bütün ideoloji-siyasi mücadilələrin sonu məğlubiyyətdir.
İnsanımıza bu böyüklərimizi tanıtmalıyıq ki, doğru cəmiyyət qura bilsinlər.
Adı Azərbaycanla bərabər çəkilən Əhməd Cavadın bütün həyatı və yaradıcılığı milli məfkurəyə və istiqlal ideyasına həsr olunub.
Azərbaycanda milli kimlik şüurunu formalaşdıran nəhəng mütəfəkkirlərdən biri – Əhməd Cavad!
Türk millətçiliyinin fikir babası, bir ölkənin HAQQ bağıran səsi, millət aşiqi Əhməd Cavadı!
Millətə fəda olunan bir ömrün və ailənin sahibi Əhməd Cavad!
Sınmayan insanların örnək cəsarət və millət sevgisinin tablosu idi bu ömür yolu…
Millətin intellektual beyinlərini qəddar və amansız repressiyaya məruz qoymaqla genefondumuzu məhv etmək istəyən Sovet Rusiyasının bu əməllərini daim yeni nəsillərə çatdırmaq gərəkir.
“Susmaram” şeiri isə bizim ikinci himnimiz olmalıdır.
Mən bir qulam, yük altında əzilmişəm, qardaşım,
Sevinc bilməz bir məhkumam, ahu-zardır sirdaşım,
Damğa vurub, zəncirləyib, tullayıblar zindana,
Qarlı-qışlı cəhənnəmlər məskən olmuşdur mənə.
Mənə dinmə, sus deyirsən, nə vaxtacan susacam,
Böhranların, hicranların, məhbəsində qalacam?
Niyə susum, danışmayım, insanlıqda payım var,
Mənim ana Vətənimdir talan olan bu diyar.
Niyə susum, danışmayım, Türk yurdudur bu torpaq,
Oğuzların, elhanların, vətənində kimdir bax!
Bu dünyada azadlığı şan-şöhrətdən üstün tut,
Alçaqlığı, yaltaqlığı, rəzilliyi sən unut!
Necə susum, danışmayım, mən eləyim xəyanət?
Hanı sevgi, hanı Vətən, de harda qaldı millət?
Mən bir qulam, yerim qızıl, suyum gümüş, özüm ac,
Atam məhkum, anam məzlum, elim hər şeyə möhtac.
Mən bir türk övladıyam, dərin ağlım, zəkam var,
Nə vaxtacan çiynimizdə gəzəcəkdir yağılar?
Nə qədər ki, hakimlik var, məhkumluq var, mən varam,
Zülmə qarşı üsyankaram, əzilsəm də susmaram!
Böyük bir sevgi ilə anıram!
