Qeyd edək ki, həmin seçkilərdə özünü “müxalifət” adlandıran marginal qruplaşmadan başqa cəmiyyət həyatında iştirak edən bütün siyasi qüvvələr iştirak etmişdir. Azərbaycan cəmiyyəti həmin dırnaqarası toplumla bağlı öz qərarını isə artıq çoxdan verib. Qədirbilən xalqımız həmin rüsvayçı qruplaşmanı tarixin zibilliyinə göndərməklə, onlara əsl yerlərini göstərib. Əlbəttə ki, onların təkrar siyasi səhnəyə qayıtmaları mümkünsüzdür. Bu gün Ölkəmizin siyasi həyatında əhəmiyyətli rol oynayan qanunverici qurumumuz qəbul etdiyi qərarlarla xalqımızın, dövlətimizin inkişafına xidmət edir. Yarandığı 30 ildən artıq müddətdə xalqın partiyasına çevrilmiş Yeni Azərbaycan Partiyasının Milli Məclisdəki yerlərin əksəriyyətini qazanması təbiidir. Bu fakt da özlüyündə hakim Partiyanın Milli Məclisdəki sözünün və səsinin kifayət qədər təsirli olmasına zəmin yaradıb. Hərçənd ki, əvvəlki çağırış parlamentlərin, onun komitələrinin rəhbərliyində müxalifət nümayəndələri təmsil olunmurdu. Lakin bu gün Parlament və Komitə rəhbərliklərində müxalif partiya nümayəndələrinin təmsil olunmaları müsbət və təqdirəlayiq haldır. Yuxarıda qeyd etdiklərimizin daha bir bariz sübutu isə dövlətimizin cəmiyyət həyatında iştirak edən bütün siyasi partiyalarla dialoq qurmaqda maraqlı olmasıdır.
Ötən dövr ərzində Prezident Administrasiyası rəhbərliyinin siyasi partiya rəhbərləri ilə görüşləri dövlətin fundamental əsaslarının möhkəmləndirilməsi məsələsində cəmiyyətin iştirakçılığını təmin etmək məqsədi daşıyır. Cəmiyyət institutlarının təklif və tövsiyələrinin dinlənilməsi, bunun üçün şərait yaradılması Azərbaycan Respublikasının demokratik inkişafının təzahürüdür.
