“Azərbaycan xarici siyasətlə bağlı nümunəvi ölkə sayıla bilər. Ona görə ki, Azərbaycan dünyada sülhə, sabitliyə xüsusi töhfə verir”. Möhtərəm Prezidentimiz cənab İlham Əliyev çıxışlarının birində belə söyləyərək, fikirlərinə aşağıdakı əsaslarla qənaət gətirmişdir: “Ölkəmizdə keçirilən humanitar forumlar, konfranslar, yüksək səviyyəli iclasların gündəliyində dünyada sülh prosesinin irəli aparılması, ədalətin bərqərar olunması dayanır”.
Göründüyü kimi ölkəmizin xarici siyasəti və diplomatik əlaqələri son 20 ildə özünün ən inkişaf etmiş mərhələsinə qədəm qoymuşdur. 2020-ci ildə qazandığımız tarixi qələbə isə Azərbaycanımızı sözün əsl mənasında dünyanın diqqət mərkəzinə daşıdı. Dünyanın inkişaf etmiş və inkişaf etməkdə olan ölkələri ilə yaradılan dostluq, ticari, mədəni və digər sahələrdəki əməkdaşlıqlar dövlətimizin beynəlxalq miqyasda yüksəlişinə böyük təsir göstərir, geniş imkanlar yaratmaqla beynəlxalq sferada daha da möhkəmlənməsinə yol açır.
Aprelin 4-də Azərbaycanla Konqo arasında imzalanan Əməkdaşlıq haqqında Bəyannamə iki ölkə arasında yeni münasibətlərin təməli olmaqla yanaşı, Afrika ölkələri ilə əlaqələrin gələcək inkişaf yoluna, o cümlədən neokolonizmlə mübarizə aparan Afrika ölkələri üçün yeni imkanlar, yeni üfüqlər açacaqdır. Müstəqillik tariximizə nəzər salsaq, Azərbaycan və Konqo arasında diplomatik əlaqələrin yaxın tarixdə, 2011-ci ildə yaradıldığının görürük. Bununla yanaşı, iki ölkə arasındakı münasibətlərin uzun müddət diqqətdən kənarda qaldığının şahidi oluruq. Yalnız Azərbaycanın Qoşulmama Hərəkatına sədrliyi və sonrakı dönəmdəki diplomatik münasibətlərdə bu istiqamətdə aktivlik yaranmış, canlanma müşahidə olunur. Göründüyü kimi artıq hər iki ölkə mövcud potensiallarını ortaya qoyaraq ikitərəfli əlaqələri inkişaf etdirməkdə maraqlıdır. Dünyada baş verən iqtisadi-siyasi reallıqlar müstəvisində bu əlaqələri canlandırmaq hər iki ölkə üçün maraqlar çərçivəsində əhəmiyyətli və perspektivli görünür. Konqo Demokratik Respublikası Afrika qitəsində bir sıra üstünlükləri ilə seçilir. Ölkə təbii ehtiyatları-neft, mineral və metal ehtiyatları, demoqrafik potensialı və iqtisadi artımına görə Afrikanın öndə gedən ölkələrindən biri hesab olunur. Lakin əlverişli coğrafi mövqeyə və zəngin təbii sərvətlərə malik Konqonun bu sərvətləri ötən əsrlərə qədər amansızcasına istismar edilmiş, müstəmləkəsi olduğu dövlətlər tərəfindən daşınmışdır.
Qeyd etmək yerinə düşər ki, siyasətin bu çirkin siması coğrafi və siyasi müxtəlifliyə baxmayaraq vaxtilə Azərbaycandan da yan keşməmişdir. Bu gün isə hər iki ölkə öz gələcək perspektivlərini müəyyən edərək, neft, enerji, təbii ehtiyatlar, ictimai xidmətlər sektoru, təhsil, turizm, humanitar elmlər və digər sahələrdə əməkdaşlıq münasibətləri yaradaraq güclü dostluq əlaqələri çərçivəsində fəaliyyət mexanizminin əsasını qoyur. Konqo Demokratik Respublikasının Prezidenti Deni Sassu-Nqessonun bu günlərdə Azərbaycana tarixi səfəri böyük prespektivlər vəd edir. Ali qonağı qəbul edərkən; “Əminəm ki, Konqo ilə Azərbaycan arasında güclü dostluq əlaqələri yaradılacaqdır” – deyən Müzəffər Ali Baş Komandan cənab İlham Əliyev bu fikirləri ilə iki ölkə arasında münasibətlərimizin təməlini qoyan Əməkdaşlıq haqqında Bəyannaməyə yüksək qiymət verdiyini göstərmişdir.
Nəzakət Quluqızı;
Neftçala rayonu, ictimai fəal
