NATO-nun Şimali Atlantika Əməkdaşlıq Şurasının üzvü olan Azərbaycan ötən müddət ərzində Təşkilatla əməkdaşlığını milli maraqlar üzərində qurmuş, beynəlxalq təcrübədən yararlanmağa çalışmışdır. Ölkəmiz 30 il davam edən və tarixə qovuşan “Dağlıq Qarabağ problemi”nin mövcud olduğu zamanlarda fasilə vermədən Ordumuzun mobilizasiyasını davam etdirmiş, müasir silahların ordunun arsenalına daxil edilməsi və peşəkar zabit heyətinin yetişdirilməsinə çox böyük önəm vermişdir. Bu faktdır ki, müstəqilliyimizin ilk illərində cəmiyyət həyatımızın bütün sahələrində olduğu kimi, ordu quruculuğu sahəsində də böyük çətinliklər müşahidə edilirdi. Lakin illər ötdükcə, ölkəmizin maliyyə imkanları artdıqca, bütün sahələrdə olduğu kimi ordu quruculuğunda da müsbət istiqamətdə irəliləyişlər müşahidə edilməyə başladı.
Məhz bunun nəticəsi idi ki, Şanlı Azərbaycan Ordusu nəhayət xalqımızın otuz illik həsrətinə son qoydu və torpaqlarımızın düşməndən geri qaytarılmasını məhz döyüş meydanında həll etdi. Bəli, bu gün ölkə sərhədlərini Azərbaycan sərhədçisi qoruyur. Regionun, ümumiyyətlə beynəlxalq münanisəbtlərin kifayət qədər mürəkkəb və qeyri-stabil olmasını nəzərə alsaq, Azərbaycan Ordusunun öz gücünü mütəmadi olaraq artırması vacib şərtlərdən sayılmalıdır. Bu səbəbdə ndə Azərbaycanın NATO kimi güclü hərbi təşkilata üzv olan ölkələrlə qarşılıqlı əməkdaşlığı təqdirə layiqdir. Azərbaycan–NATO münasibətlərinin tarixi 1992-ci ilə təsadüf edir. Məhz həmin il Azərbaycanın Şimali Atlantika Əməkdaşlıq Şurasına üzv qəbul edilməsi Azərbaycan-NATO münasibətlərini keyfiyyətcə yeni müstəviyə qaldırmışdır. Bu gün Azərbaycan nəinki regionda, eyni zamanda dünyada sülhün bərqərar olmasına çalışan nadir ölkələrdəndir.
Qeyd etməliyik ki, Azərbaycan daim NATO nun sülhyaratma proqramlarında yaxından iştirak edib. Biz buna Əfqanıstan, İraq, Kosova kimi dövlətlərdə Azərbaycan ordusunun zabit və əsgərlərinin sülhyaratma proqramlarında yaxından iştirakını misal göstərə bilərik. Mart ayının 17-də NATO-nun Baş Katibinin Azərbaycana səfəri bir daha sübut edir ki, bu gün NATO ölkəmizlə əməkdaşlıqda maraqlıdır. Əminik ki, NATO Baş katibi Yens Stoltenberqin ölkəmizə səfəri Təşkilatla münasibətlərin daha da dərinləşməsinə böyük töhfə verəcəkdir.
Könül İsmayılova;
Neftçala rayonu, müəllim
