Azərbaycanın öz torpaqlarını işğaldan azad edib, ərazisində separatçıların kökünü kəsməsinin şokundan ayıla bilməyən Fransa ölkəmizə qarşı təxribatlarını, əsassız ittihamlarını davam etdirir.
30 il torpaqlarımızı işğalda saxlayan, Ermənistana dəstək göstərən, ATƏT-in həmsədri kimi Ermənistanın işğalçılığını legitimləşdirmək istəyən Fransa Cənubi Qafqaz regionunda Azərbaycanın yaratdığı reallığı gəbul edə bilmir.
Ermənistanın Baş Naziri Paşinyanın Fransaya bu dəfəki səfəri təsadüfi deyildi. Münhen Təhlükəsizlik Konfransında Azərbaycanın siyasi uğurundan, dünya ölkələrinin, hökumət və dövlət başçılarının Prezident cənab İlham Əliyevə böyük hörmət və ehtiram göstərmələrindən narahat olan Makron Paşinyanı Fransaya dəvət etdi.
Makron-Paşinyan cütlüyünün Azərbaycana qarşı bəyanatları bu dövlətlərin ölkəmizə qarşı təxribatıdır. Qarabağı könüllü şəkildə, öz arzuları ilə tərk edən ermənilərin hüquq və azadlıqlarından danışan, güya onların zorla qovulması və geri qayıtmalarına şans yaradılması barədə Makron əsassız, riyakar bəyanat səsləndirdi. Əslində Qarabağdakı ermənilərə ən böyük şansı məhz Prezident cənab İlham Əliyev vermişdir.
Ölkə başçımız dəfələrlə vurğulamışdır ki, Qarabağdakı erməniəsilli vətəndaşlar Azərbaycan cəmiyyətinə inteqrasiya olunub, Azərbaycan qanunlarını və Azərbaycan vətəndaşlığını qəbul edib ölkəmizdə yaşaya bilərlər.
Ermənilər Qarabağdakı separatçıların və Qərbdəki havadarlarının təzyiqi ilə oradan çıxıblar. Əgər Makronu insan haqları bu gədər düşündürürsə, niyə Ermənistan ərazisindən, öz gədim yurd yerlərindən qovulan 100-minlərlə azərbaycanlıların doğma evlərinə dönmələri haqqında, azərbaycanlıların Qarabağdan qoyulmasından, işğaldan azad edilən ərazilərdə tapılan kütləvi şəkildə basdırılan azərbaycanlıların hüquqlarından, erməni vəhşiliyindən danışmır? Bu Makronun ikiüzlüyünün, riyakarlığının nümunəsidir.
Əslində Makronun hərəkətləri ermənilərə olan sevgisindən irəli gəlmir.
Fransa Ermənistanı alətə çevirməklə regionda güc mərkəzinə çevrilən Azərbaycan-Türkiyə birliyinə təsir etmək, regionda öz nüfuzunu artırmaq istəyir.
Fransa dövləti ayaq basdığı ərazilərə ancaq müharibə, savaş gətirir.
Azərbaycan dünyada artıq nüfuzunu itirmiş Fransanı dəfələrlə siyasi arenada məğlubiyyətə uğradıb. Makron sonda məğlub olacağını anlayıb Cənubi Qafqazdan geri çəkiləcək və Ermənistanı meydanda tək qoyacaq. Bu dövlət hər zaman öz maraqları naminə dost və müttəfiq saydığı dövlətləri qurban verib. Ermənistan rəhbərliyi başa düşməlidir ki, dövlət kimi yaşamaları və inkişafları regiondakı güclü Azərbaycan və Türkiyə ilə normal münasibətlər qurmaqdan keçir.
Kamilə Əliyeva
Milli Məclisin deputatı, professor
BAŞ REDAKTOR: BÜNYAMİN ÇİNGİZOĞLU
RESPUBLİKAİNFO.COM
