Ötən gün Milli Məclisin növbədənkənar iclasında çıxışı zamanı millət vəkili Qüdrət Həsənquliyev təklif edib ki, Rusiyada müharibəyə cəlb edilən soydaşlarımızın ölkəyə dönüşünü asanlaşdırıb onların həyatlarını xilas etmələri üçün vətəndaşlarımızın Rusiya ilə quru sərhəddən heç olmasa ölkəyə girişinə icazə verilsin.
Mövzu ilə bağlı Milli Məclisin deputatı Azər Allahverənov bildirib ki, zaman-zaman Rusiyadan qayıtmaq istəyən şəxslər müxtəlif sosial platformalar, qruplar və media vasitəsilə sərhədlərin açılması üçün müraciətlər edirlər:
“Onların əsas istəyi heç olmasa birtərəfli qaydada sərhədin açılması və ölkə ərazisinə giriş imkanının yaradılmasıdır. Bəlli məsələdir ki, bu, Nazirlər Kabineti yanında Operativ Qərargahın səlahiyyətində olan məsələdir. Çünki karantin rejimi ilə bağlı vəziyyəti dəyərləndirmək, quru sərhədlərin bağlı qalmasının vacibliyini müəyyənləşdirmək məhz onların öhdəliyindədir. Qərargah ümumi vəziyyəti nəzərə alaraq karantin rejiminin müddətini uzadır və bu zaman digər aidiyyəti qurumlardan, xüsusən də Səhiyyə Nazirliyindən rəy toplayır”.
Millət vəkili əlavə etdi ki, sərhədlərin açılması istiqamətində müəyyən təcrübə də mövcuddur.
“Məsələn, bir müddət Türkiyə ilə sərhəd qısa zaman kəsiyində açılmışdı. Deməli, belə praktikaların tətbiqi mümkündür. Amma sərhədlərin birtərəfli qaydada açılıb-açılmaması yenə də aidiyyəti qurumların dəyərləndirəcəyi məsələdir. İstənilən halda, ölkəyə quru sərhədlərlə daxil olmaq istəyən şəxslər Operativ Qərargaha müraciət etməlidirlər. Onlar müraciətlərində səbəblərini əsaslandırmalıdırlar. Əgər təqdim edilən əsaslandırmalar kifayət qədər güclü olarsa, Operativ Qərargah vəziyyəti dəyərləndirərək daha həssas məsələlərlə bağlı fərqli qərarlar qəbul edə bilər. Lakin hər bir halda bu tip müraciətlərin birbaşa Operativ Qərargaha yönləndirilməsi vacibdir”,- deyə Azər Allahverənov yekunlaşdırdı.
