Respublikainfo.com xəbər saytı olaraq ölkədə və dünyada baş verən mühüm xəbərləri obyektiv şəkildə yayımlamaqla yanaşı vətəndaş şikayətlərini də media vasitəsilə işıqlandırırıq.
Beləliklə redaksiyamıza növbəti şikayət Binəqədi rayonunda yaşayan bir qrup sakin tərəfindəndir. Sakinlərin müraciətinin əsas səbəbi və bizdən xahişi onların problemlərinin media vasitəsilə ictimailəşdirilməsidir.
Sakinlər şikayətlərində qeyd edirlər ki, Binəqədi rayonu Həmzə Babaşov küçəsindən Nərimanov rayonu ərazisindəki Vladimir Mayakovski küçəsinə, yəni Montin bazarı istiqamətində hərəkət edən 26 saylı avtobus xidməti çox bərbaddır. Beləki sözügedən marşrut sərnişinlərin rahat hərəkətini təmin edə bilmir.
Müntəzəm olaraq bu marşrutdan istifadə edən sərnişinlərin bir qrupu Respublikainfo.com- a göndərəədikləri şikayət məktubunda onu da vurğulayıblar ki, xəttə buraxılan avtobuslar həm köhnə həm çirklidir. Oturacaqlar narahatdır. 26 saylı avtobuslarda ümumiyyətlə istilik sistemi yoxdur. Soyuq fəsillərdə isitmə olmadığından üşüyürlər yayda isə kondisioner olmadığından istidən əziyyət çəkdiklərini bildirirlər. Həmçinin avtobusların içərisində bir qayda olaraq boğucu qoxu və tüstü olur. Bu da 26 saylı avtobusların köhnə və artıq xidmətə yaramadığının nəticəsidir.
Sərnişinlər onu da qeyd edir ki, həmin istiqamətdə hərəkət edən bütün digər xətt avtobusları hamısı müasir avtobuslardır. Yalnız 26 saylı avtobusdan savayı. Sərnişinlər məsələnin tezliklə öz həllini tapması üçün Azərbaycan Yerüstü Nəqliyyat Agentliyinə məlumat verməyimizi xahiş ediblər. Bununla bərabər yaxın zamanlarda dövlət başçısına bu məsələ ilə bağlı müraciət etməyi planlaşdırdıqlarını da bildiriblər.
Eyni zamanda sərnişinlər deyir ki, sürücülərin əksəriyyəti sükan arxasında mütəmadi olaraq siqaret çəkir və mobil telefonla danışırlar. Sürücülər hər dayanacaqda sərnişin toplamaqla vaxtı uzadırlar.
Sərnişinin sözlərinə görə, 569 nömrəli xətt üzrə işləyən avtobuslar həm köhnə, həm çirkli həm də nasazdır.
“Bütün fəsillərdə bu kondisionersiz avtobuslar qapıları açıq vəziyyətdə idarə olunur. Avtobusların sayı məhdud olduğundan və intervalın böyüklüyündən sərnişinlər xeyli gözləməli olurlar. Avtobuslar yuyulmur, təmizlənmir”, – deyə şikayətçilər əlavə ediblər.
Nəzərə alsaq ki, noyabr ayında ölkəmiz beynəlxalq miqyasda Cop29 kimi çox nüfuzlu bir tədbirə ev sahibliyi edəcək. Güman edirik ki, o müddətə qədər sözügedən məsələ də öz həllini tapacaq və sərnişinlər də məmnun olacaqlar.
